文中要點+短評：

1. 只睇片，唔練習，唔會有用

要知道要成功施展任何技巧，都必須準確掌握每個要點、時機、距離等。而實戰當中，機會往往係一瞬間嘅事，如果到時仲慢慢諗要點做，一定唔會做到。另外，只睇片唔練習，亦有機會會高估左自己嘅能力。

2. 唔好過分神化要害打擊

文中已探討要害打擊成功率嘅問題。想再補充一下，並非所有情況都適合打擊要害，例如只係鬧市中同人爭執，比人捉住手或者衫，可以有其他較低風險嘅做法，打擊要害反而會有手尾。

3. 搏擊運動同防身自保嘅分別

要明白前者同後者，喺技術、心態、策略上都有一定嘅差異。並非所有運動搏擊類武術嘅招式策略，都可以直接應用喺街上。街頭防身自保，變數比前者多好多。

4. 體能嘅重要性

呢個唔特別解釋，只可以講街頭生唔生存到，由好多因素決定，技術係其中一個，體能亦係其中一個。而練體能係冇捷徑，所以希望大家坐言起行，操好體能。

最後都想強調一樣野，學習武術同自衛術各有佢嘅好處同重要性，兩個界別嘅人士都唔需要貶低對方。如果要打個比喻，綜合格鬥同自衛術相比，就好比田徑運動同parkour嘅分別，只可以講兩者存有異同，應用嘅範圍唔同。