去年9.29港島區「全球反極權大遊行」後警民衝突期間，社工總工會總幹事許麗明被指涉嫌推開警員，原被控一項襲警罪，但控方喺上星期開審前改控阻差辦公罪。裁判官鍾明新今日裁定「罪名不成立」，指警員證供不可靠。

涉案警員莊的朗早前出庭作供指，被告當時情緒激動，衝向警方及被捕人士，大叫「你哋唔好打啲小朋友」。莊指當時要求被告離開，但反被被告推胸口位，導致莊失平衡跌倒；而當莊企起身後，被告向佢嘅腹部撥咗一下，莊反應唔切，向後跌坐喺馬路上。

裁判官鍾明新指，當日男警員嘅證供同呈堂片段有「關鍵性差別」，認為佢嘅「證供唔可靠」。鍾官續指，佢已經多次以慢鏡重睇事發片段，但就「睇唔到被告喺10秒內點樣作出阻繞行為」，又表示被告態度合作，並冇作出任何反抗，反指警員自己兩度跌倒，因此被告並冇意圖襲擊警員，最後裁定罪名不成立。

許麗明上庭後見記者時不忘勉勵大家，佢希望大家一定要記住「我哋唔係犯法，亦都冇犯罪」；佢又想向可能面對緊控罪、審訊，或者曾經被捕而未被起訴嘅每一位朋友講，「要相信自己冇做到嘅，係會得公義嘅審訊，要相信自己係會有好多人支持你」。佢又表示，如果暫時未搵到（支援），大家可以話俾佢哋知，「我哋係社工，可以支援你嘅」。

資料來源：立場新聞
圖片來源：RTHK

https://www.facebook.com/273813022746352/posts/3447647428696213/?d=n