【47 人案是一場政變】

民陣召集人陳皓桓：

政權以《國安法》控告初選參選人已經好荒謬，更要面對幾日馬拉松式審訊折磨。希望所有香港人堅持自己信念，唔好放棄民主自由公義，係原則亦都係底線。正如被告離開法庭時，大叫「香港人加油，撐住！」希望大家都能夠做到。

最後，被告們呢幾日透過新聞見到咁多香港人到法院聲援，覺得非常鼓舞，代每一位家屬感謝大家支持。

由動用《國安法》到更改參選條件，顛覆人民選擇，今次政府行動係一場政變，民間人權陣線絕不認同。政府應該立即回應人民訴求，呢個係 200 萬曾走上街頭、60 萬曾參與初選市民嘅信念。

—

梁國雄太太陳寶盈：

今日審訊結果係預料之內。《國安法》設立之後，司法制度完全扭曲顛倒，過去法官認為衡量被告會否違反保釋條件及潛逃風險，決定可否保釋，現在卻要法官信納被告唔會繼續進行所謂違法行為。

今日所有被告都願意接受嚴苛保釋條件，律師代表亦好清楚講到律政司控告材料薄弱，但最後大部份人仍然不得保釋，其餘亦被律政司覆核，無理地被還押三個月。《國安法》下，公平審訊及言論自由已經失去保障。

—

岑敖暉太太余思朗：

呢幾日多謝家屬朋友與傳媒朋友到場支持。岑敖暉家屬雖然有心理準備，但仍然好傷心，我地會就保釋決定作出上訴。

警方提早個幾月拘捕，將 47 人帶上法庭審訊，4 日審訊以來親人每人到場旁聽，但都入唔到內庭見唔到面。

雖然關乎重大公眾利益，案件仍不得報導，就連法庭外電視亦無轉播，資訊非常不流通，令人懷疑《國安法》相關案件會發展至秘密審訊。警方提早拘捕，但就要求被告還押 3 個月，非常唔合理、唔合比例、唔公平，我非常傷心，憤怒。

最後呼籲大家繼續支持 47 人，香港人加油！

—

朱凱廸太太區佩芬：

今次案件，係改變香港政治、香港現狀重要案件，希望世界各地與香港人繼續關注。作為家屬，我地要同舟共濟，亦希望得到香港人支持，多謝大家。