【一個組織嘅解散唔代表完結，我哋喺社區再見】

文｜TLDR

多謝職工盟💛我會好掛住呢個地方，好掛住大家。一個組織嘅解散唔代表完結，我哋喺社區再見。

唔知大家聽到職工盟會諗起啲咩呢? 以前應該都係最低工資、Carol同李卓人。點都冇諗過自己竟然會同呢個組織有關係。

兩年前因為朋友嘅關係，誤打誤撞加入咗工會。然後喺呢到我認識到一班有相同理念嘅人，令我覺得唔係得自己一個。

我發現短短呢年幾兩年，自己因為工盟都成長唔少。以前我又被動又怕醜，根本冇諗過自己會企喺街到同陌生人講嘢。喺工盟，我出咗人生第一次街站，最初戰戰競競到後期輕鬆少少咁派文宣。之後嗌咗一次咪。十年前嘅我應該冇諗過自己竟然會喺街頭嗌咪。喺我最唔知仲可以做咩嘅時候我遇到大家💛

仲想借呢個機會多謝性別小組嘅每一位💛 職工盟講性別議題? 認真咩? 自己一直好想推性別議題，但係得自己一個唔知點樣開始。好好彩喺到搵到一班志同道合嘅人🏳️‍🌈縱使我有好多不足，大家都冇嫌棄。多謝你哋💛

諗返職工盟原來都比咗好多好好嘅回憶我。喺呢到我遇到好多好好嘅人，可以一齊圍爐取暖。大家會為咗同一個目標一齊努力。即使未來冇咗職工盟，但唔代表我哋就會消失。我會好好裝備自己，直到下次再重聚嘅一日💛

最後想多謝職工盟嘅每一位，整咗個展覽出嚟。比我哋可以更了解工盟，了解工運歷史💛辛苦哂!

#NeverSurrender
#下一次再聚 #序是一切的開始 #敍述你我與香港的故事
#職工盟 #未散 #職工盟30年
#Whenwillweback #hkctu30
#SolidarityWithHKUnions #WeLoveFreedomInHK