公眾對新巴城巴的迷思：解構電話app的幽靈班次

相信大家搭巴士嗰陣應該都會查一查個app，有時架車寫住某一個時間會到，但到嗰一個時間架車又消失咗，大家有冇諗過點解呢？而到下一班車埋站嗰陣，問嗰個車長又答你唔到點解個app會咁，咁小編姐姐今日話俾大家知。

其實關於呢一個問題，造成嘅原因有外在因素同內在因素，只要中咗其中一個因素電話app就會出現幽靈班次：

1）架車無消失，只係中途有阻滯延遲：
例如個app預咗架車8點鐘到B站，但架車係中途遇到塞車，抑或係盞盞燈都係紅燈；又或者架巴士係A站淨係上客都上咗幾分鐘，咁佢就會遲咗出發去B站，咁個電話app會更改B站個到站時間

2）架車中途發生事故
事故可以係交通事故、壞車、乘客事件、或者係路面突發情況架車行唔到，要停止服務。交通意外、壞車就較常見而大家都明我就唔多講；而乘客事件就例如有乘客打交、有乘客係巴士上突然病發等等；而路面突然事件，就例如有外界交通意外封路、突發爆水管等等

3）架車壞GPS
呢樣就真係唔洗多講，就係GPS壞咗，收唔到嗰一班車嘅信號。不過個app就會寫返預計到達時間，佢會計架車由總站到各個分站嘅距離嚟顯示返到站時間落個app，不過路面情況千變萬化，如果架巴士壞GPS而中途有延誤，咁呢個時間就會不準確

4）開出的巴士與電腦不符
呢一樣係好常見嘅問題，例如下一班車原本車號係5501但最後改用5502開出，而站長無係電腦更改，咁個app就會有兩班車同時出現，一班就係真正有開嘅班次，而另一班就會係系統誤以為巴士壞GPS而估算到站時間嘅班次。不過唔一定係站長問題嘅，有時可能係車長自己拎錯巴士

5）車長選擇錯誤嘅路線版本
有啲路線唔係全日劃一都係同一條路，有啲線會有特別班，例如9號車入大浪灣、970X田灣特別班等等。如果嗰位車長係報站機㩒錯路線版本，咁系統又會有兩班車同時出現，情況就好似上一段所講，一班真車，一班幽靈車

6）車長揸巴士兜圈時開住報站機
有時個總站係繁忙時間會有太多巴士，咁有啲巴士早啲開有啲巴士會冇咁早開，咁冇咁早開嘅巴士首先入站嘅話，咁就會阻住其他巴士，咁車長就會拉開冇咁早開嗰一架車，但如果郁車嗰陣佢冇暫停個報站機，咁佢一開車個系統就會誤會嗰一班車立即開出，咁個app就會顯示呢一架車，但實際上呢一架車未開..

7）站長太繁忙入唔切機
有時個巴士站太多嘢做，個站長入唔切機，未更改總站班次資料，咁就會一次過出現晒上面第四段、第五段嘅情況