2025香港天氣及風暴追擊 (Since 2017)

#Admin專欄 #哥布林與NPC @Windseasonbro

TLDR:咪撚自嘲做哥布林，女人中意自信嘅男人!

約莫二十年前，陳奕迅有一首歌叫做浮誇，歌詞有一段描述當時嘅『謝師宴毒撚』：『那年十八　母校舞會　站著如嘍囉』。當年高登仔以毒撚自居，隔咗十幾年高登嘅後繼版連登亦然，早幾年好多人自嘲自己人生如無靈魂，No People Care嘅NPC。

呢個『梗』，同之後自嘲自己係『哥布林』嘅用法都係來自臺灣。二者大多相似，但後者更有『幫女玩家升級』的意味。

哥布林長相醜陋、身材矮小，喺好多唔同嘅小說、電影、動漫、Online Game入面都唔係主角，甚至奸角都不如，通常係主角群可以輕鬆打飛嘅小角色，並唔討好。

一時之間，臺灣、香港、澳門、中国幾地嘅人都用『哥布林』嚟形容『毒撚』，亦有好多人係自嘲自己係哥布林———雖然有啲人本身就係靚仔：金城武同鄭伊健都係好熱愛打機，定義上佢哋係靚仔嘅毒撚，但當然無人會話伊健毒，因為靚仔嘅毒，係『I人』，樣衰嘅毒，係『哥布林』。

但而家好多本身明明好熱愛社交、善於社交嘅人自定義係I人(我知道I、E嘅定義係指本人會經獨處定一班人而獲取能量，但呢度講嘅人明顯係『E人扮I人』，亦有好多『男玩家』扮『哥布林』。

明明係米八有自己興趣，唔限於打機、動漫，亦受女性歡迎，但自定義為『哥布林』，呢種人係『扮哥布林食豬』，甚至有靚女自稱『哥布林』，呢堆人嘅舉動，係為咗喺一個比較低嘅Level搵一堆真正嘅哥布林抬高自己。

然而，風巴 @Windseasonbro 日前做咗個投票調查，發覺都好多人定義自己為『哥布林』，比較少人定義自己為『男主角』。中小學階段，應該好多自我中心嘅人定義自己做主角，但當進入社會，知道自己不足時，就應該知道自己無可能做一世主角。

世界唔會圍住自己轉，但風巴認為人生嘅主角永遠都係自己，呢篇文係想寫畀想改變嘅大家，無論係男定女都好，你唔單止係其他人嘅配角，更加係自己人生嘅主角，你要為自己負責，但亦唔需要自己叫自己做哥布林，要做到不卑不亢，要自信自己嘅能力。

你係主角，就算能力唔夠、樣唔靚，天生我才都必有用，唔好下下尋死或EMO，無女人會中意一個EMO嘅哥布林，Right？

我認識好多人，雖然唔係靚仔，但係喺自己領域發揮所長，唔自大但亦唔自卑，咁樣嘅一個人，唔好話佢男定女，都會有人欣賞。

但如果成日都覺得自己無人中意，怨念太深，個氣場只會愈來愈差。

對我嚟講，唔止愛情要表現做男主角：論親情，我都會兼顧並重，樂於做長輩嘅配角，唔好畀佢哋覺得自己係NPC；論友情，朋友搵得多錢過我、靚仔過我、事業愛情兩得意，我由心而發戥佢高興、朋友搵唔到錢、家破人亡都好，我都唔會笑鳩佢，樂於做朋友嘅最佳男配角...

投票有魔王一項，我而家睇返都可能有少少中二病，簡單地講，就係除咗唔好當自己做哥布林同NPC，亦唔好當自己係王子公主，同埋魔王咁撚重要。

對風巴 @Windseasonbro 而言，我既係自己人生嘅主角，亦係其他人人生嘅配角，我嘅價值唔需要任何人去評價，我就係我。

你呢？

如果你之前定義自己做哥布林，請由今日開始，重新做人，總有人會欣賞你，前提係你要識得欣賞自己。

如果你堅信自己而家係Level 1嘅哥布林，我可以答你，做男人永遠裝備自己嘅唔係遊戲機同電腦，亦唔係萬貫家財就可以，人生無錢的確萬萬不能，但有錢唔係大撚晒。

錢，喺資本主義社會的確好吸引，我亦有見過好多財大氣粗嘅男人不乏異性，但係真真正正吸引到正緣嘅，唔單止金錢，更加要有思想裝備。

簡單講，如果你同一個有內涵嘅男人一樣好有錢，你覺得最後你定佢會吸引到更多女人？

男人唔怕學多幾樣嘢，唔好掛住打機，如果你嘅生命大部份時間都係電腦電話，咁的確係難以吸引到其他人，Work hard, play hard，打機時可以專心打，但亦要意識自己唔好淨係得打機同動漫。

請各位繼續跟隨暴風雨巴 @windseasonbro 追風，感謝各位由2016年至今都一直支持本頻道！

幫我Share畀你所有朋友、所有TG Group，我希望大家都有所得着！

如果TG喺你哋心目中只有用嚟睇咸濕嘢，而唔係加入唔同有心做嘅Channel，咁樣你哋的確係比女人定義做『哥布林』嘅男人，所以如果想改變，就Follow風巴，即刻做❗️

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel ❤️ @Windseasonhk ，並叫多兩個朋友玩TG Follow風巴，感謝=)