【讓一讓救護車真係咁難？】「緊急救護先遣服務， 老人家嚴重呼吸困難，地點係：九龍東某老人院」
兄弟收到call上到車， 一枝箭咁揸過去。可能大家未必知，老人院位處嗰條街，係一條好多車房嘅街，一般來講都會有好多死車泊咗喺側邊。
去到果然冇令兄弟失望，成條街左邊同右邊都泊晒死車。成條行車路得返嘅空間，只係僅僅夠一架救護車，用好慢嘅速度先可以前進。咁無辦法，由於救護車一定要泊喺距離事發地點最近嘅停車處， 所以最後救護車block住咗條路, 同埋通知咗警察有咁嘅情況。
正當佢哋三兄弟落車拎好晒裝備，準備上去老人院做嘢嘅時候，周邊嘅車房員工同的士司機就開始對我哋大聲喝罵！
「搞X錯呀！泊架車喺度阻住晒成條路，唔使人行呀？泊出去前面街口咪得囉阻X住晒！」
但兄弟們都冇理到，因為要盡快上去老人院幫婆婆檢查下咩事。上到去，婆婆嘅血含氧量只係得80！同埋面色都非常蒼白， 呼吸好吃力！所以兄弟俾咗氧氣之後， 就馬上收拾好裝備，同婆婆上救護車去醫院。
落到去之後，救護車車後邊嘅車龍已經有三至四架嘅私家車頂住咗！後方嘅一眾司機見到我哋三個人落到黎之後， 連同周邊車房嘅員工一齊對我哋大聲呼喝！
「有冇搞錯啊，三個人一齊上晒去，條路你哋行晒呀？頂住晒條路！」
當然中間夾雜好多不同種類嘅粗口。
直至佢哋見到我哋推住嘅婆婆面色蒼白， 聞着氧氣都仲係唞氣辛苦嘅樣，佢哋先收聲，而我哋上到車之後都馬上開走。
喺呢件事上面兄弟只係想講，佢當然明白將救護車泊去前面嘅街口，就唔會阻住條路。但兄弟泊喺呢一個位置，一定係有原因，就係想盡快將病人送到去救護車上面，再送佢去醫院！
最後問心，如果當日唔係嗰位婆婆，而係你哋自己嘅屋企人、朋友或者你最關心嘅人有生命危險，你仲希唔希望三兄弟將架救護車泊到去老連咁遠嘅街口？
坦白講冇人會想阻住條路，冇人會想阻住人發達，如果可以，梗係希望天下太平，少啲人叫救護車啦！但救護員嘅存在，係為有需要嘅傷病者治療。救人嘅嘢，一秒就一秒，如果因為你哋一時方便，令傷病者延誤送院，錯過治療嘅黃金時間，你過唔過意得去？ #救護
提交時間：2020/11/5 下午9:14
https://www.facebook.com/492354117860377/posts/1079723755790074/
