港島西。Channel

To 我愛的XXX：

過左嚟赤柱一個星期，又到左上庭既日子。朋友同屋企人同我講入嚟赤柱拜山，要坐一大段路先入到嚟，會暈車浪。但對於我嚟講，卻非常享受，本身就鐘意遊車河既我，依家仲有咁大段路俾我遊喎！我仲記得我係荔枝角問過3C「仲記唔記得個海係乜樣㗎？我好似已經唔記得左。」點知轉個頭係赤柱就有咁大個海俾我望住啦！

今日上庭非常平淡，有差佬係庭外，所以好少手足送車。同我一齊係赤柱上庭既手足莫問又拍左，要去小欖拎報告。本來我計劃係今次上庭申請保釋，係明知唔得，只係想拖多啲時間，可以係庭上面見多啲自己嘅屋企人同朋友多一陣。但唔洗，我同案已經申請左保釋，足足搞左九個字！見足九個字！係旁聽席不斷有人向我打手勢，我又太遠認唔出係邊個，只係見到不停有手勢，我都唔知點應，好搞笑>< 希望今日向我打手勢既手足可以睇到啦！

返赤柱個一程，望出窗，大片海灘俾夕陽染成金橙色，係真係好靚！係出面就係咁中意遊住車河、聽住歌，望下風景係點，好似所有煩惱都會冇哂咁！

又過一年，不知不覺間已經係第十一次上庭，我啱啱上庭個時同我既同案講過，我地應該上十五次左右就完，差唔多啦依家，唔知係咪感覺就嚟去到尾聲，又啱啱過左一年，好有想結束單case既感覺，內心會多咗諗「幾時完呢？」之前我以為係無頭無尾先會有依種既感覺，原來係中間都會有。

記得之前睇過一段美國死囚既最後廿四小時記錄片。我會諗，如果我廿四小時之後就會死，我會做乜呢？我會揀乜食物做我既最後晚餐，我會想見邊一個，我個晚會唔會訓教呢？香港係冇死刑既，但最後一個問題唔代表與我冇關，消防上庭拍個日同我講佢前晚係咁諗野，所以訓得唔好，雖然都心知係會拍幾耐，但都會緊張，可能我係臨拍前一晚都會瞓唔着。

因為就嚟望到拍個一刻，所以我諗起死囚最後廿四小時，理性上，我知道「死與我們無關，因為身體消解為原子後就不再有感覺，而不再有感覺的東醒就與我們毫無關係。」感性上，我仰望蘇格拉底面對死亡嘅坦然無懼，但如果真係發生左呢？真係做到？

上星期岑敖暉探我，我地傾起《台灣之書》，入面既人物每一個都好似係小說同電影到界定出嚟咁，英勇無比，義無反顧，「人地真係好型。。。」我讚嘆。「佢地贏左嘛，梗係有型啦。」岑講。 「唔係，係因為佢地咁做先可以贏，所以係調返轉。」 我話。「咁香港有冇人會咁做先？」佢問。 「我知道會有，依家就係注定我地就係一個咩人既時代。」我答佢。

我係書上面睇過一段說話，就係死刑前都會繼續睇書，思考人生，因為成為個更好既人係幾時都要做既事。聽日係咪要上刑場係冇影響既，我地唔洗去諗自己最後廿四小時要點，但每一日係依個時代，可能都要思考要點去面對，每一刻都決定緊自己係一個點既人，咁到底係依家呢個時代我會想成為一個點既人呢？

PS. 另外再次祝福Lester有個幸福婚姻！

尚千赴戎
木何懼火
26-01-2021