［正苦谷針數無極限
推企業做無良僱主］

林鄭平時唔見咁關照打工仔，一講到谷針數，就特別提到要「催谷上班人士」，仲表示「強烈呼籲」私人企業仿效政府對待公務員做法，一律要求員工打針，唔打針就要實行自費強制檢測。

老老實實，老闆千祈咪信呢啲「生埃貼士」，早前有校巴公司負責人大吐苦水，業內校巴保姆估計強推打針後有多達四成員工流失，人手根本應付唔到日常運作。而且，就算俾你迫到員工就範，員工條氣唔順，到頭來都必定破壞勞資關係。

再講，如果老闆要員工就範打針先可以開工，相關行業又唔係法例「指定僱員」，咁情況僱主就變相單方面更改僱傭合約，可被視作不合理解僱嘅行為。

至於唔打針就要員工自費強檢，更加係形同將職業安全及健康嘅責任，同埋相關嘅開支，轉嫁到員工身上，做法極不合理。如果僱主以強制檢測作為返工嘅必要條件，就要承擔相應開支，呢個係對僱主法定責任嘅基本要求。