好多同學非常踴躍咁分享自己的作文,發現有不少同學都容易犯的錯誤,決定一次過喺呢度講一講。大家可以留意一下自己作文會唔會都出現以下問題:
1. 內容不扣題,出現一些與題目不符合的情節/與題目設定有衝突的情節/未能理解或誤解題目要求,導致寫錯了內容
2. 文章句子平淡無奇,缺乏適當的修辭和字詞潤色。遣詞造句猶如流水帳,只是陳述時地人事,以最沈悶最乏味的手法展現文章。
3. 文章立意不夠深入,常常流於表面的一些「感悟」,其實並沒有帶出任何有用/正面/加分的信息。倉促結尾,感情亦未見昇華,例如和朋友相處,除了珍惜友情,感概有朋友真好,或者和朋友解開誤會,就止步不前,並沒有深入解釋。匆匆略過,令人覺得 「嗯?完啦?」嘅感覺
4. 主題設定不正確,思想不正確呀同學,所有愛情/情侶爭執/殺人放火/訓斥不應追求學業成就的內容,請勿出現。如果你想分享自己的戀愛觀/感情事,請你去ig慢慢抒發,或者pm導師(當然DSE就到,希望大家六根清淨,有咩DSE之後先講)抒情文你可以寫友情/親情/對老師的敬愛,但男歡女愛/韓劇狗血劇情請你留返他日自費出書。想講夢想,講達成目標,講心結,咩都好,請記住讀書萬般好,DSE係最好~(雖然我都唔想承認,但你唔鍾意還唔鍾意,考試都係要吹捧)大家都係考一次,都想考完一次就得道成仙,所以你昧著良心講佢好都係一次。
仲有其他問題但未算十分嚴重,都不在此贅述。
相信好多同學都會問啦,咁又唔得,呢樣又唔好,究竟點樣打救自己?我好簡單地先以2019年試題為例,講小小方向,等大家摸索一下~(時日無多,要摸就快啦)
2019 dse中文卷二題目如下:
【題目1】試以「這一句話,我會記上一輩子。」為首句,續寫這篇文章。
續寫文章,保命做法一定一定建議你將題目講嘅嘢寫一次。
「這一句話」,我建議大家係時候拋書包,識咩論語/古文係呢個時候背啦!然後「這一句話」,我唔理係「你是最棒的,你知道嗎?」定係「見賢思齊焉,見不賢則內自省也」咩話都好,一定要老是/經常出現在不同段落中。
呢句說話你記一輩子架,當然都唔會係啲100字箴言啦,諗句合情合理,唔太誇張的句子,然後整篇文章圍繞佢講一個故事。 最後結尾除了重申「這句話」,都試下做小小感情昇華,例如對你講呢句話的人,你對佢係點樣尊重,敬仰,或者你都好希望他日都可以成為別人的「那句話」燃亮生命
【題目2】試就你對詩歌《想想別人》的體會或聯想,以「想想別人」為題,寫作文章一篇。
首先 如果你發現睇完都唔明詩歌想帶出咩信息的,我請你果斷放棄佢,然後出門轉左。呢啲文章,一旦你的體會/聯想出錯,咁成篇文章除咗滿盤皆落索,就係下年再考過。
由於呢篇文章發揮空間太大,決定明日/或者後日/或者有日出個範文俾大家參考
但重點 看不懂就let it go
【題目3】俗語說「萬般皆下品,惟有讀書高」,也有人說「讀書無用」。試寫作文章一篇,談談你對「讀書無用」的看法。
題目「讀書無用」其實已經有前設係「讀書好有用」,議論文同學最常犯的錯就係背例子,瘋狂背例子,一段3個例子。其實議論文看重的唔係你有幾多例子,而係你自己的觀點,你點睇,你點解咁睇,例子只係支持你觀點的其中一種工具。
如果議論文只係得例子,而毫無個人見解就可以合格或者高分,咁,以後呢啲題目直接寫例子文啦。
議論文同通識寫嘅嘢有共通之處,就係除咗寫自己的立場,都要兼論反對意見,然後再用打倒反對意見。記住一定要有駁論。
好多時候,寫議論文同學都忘記最後一一步,就係點樣透過自己的長篇大論說服人,帶出一個信息。 呢題「讀書無用」,最後帶出咩信息?可以係如果只沈迷「書」中的一切,卻罔顧了現實,那麼讀再多書,亦是枉費。正所謂知之者不如好之者,好之者不如樂之者。怎樣讀,讀什麼,書是什麼,何謂好書,怎樣定義有用/無用,都係處理呢篇文章你可以用嘅切入點。
我知有啲長,但希望大家睇一睇,就當睇閱讀理解啦
如果睇完仲有問題,或者有文要改,歡迎pm
建議騷擾 老細
@okkookkookk