以下係本頻事後孔明式非專業分析：

片中所見，有5名男子突然闖入舖頭，手持武器襲擊2位事主。事出突然，對方人數多而且持有武器，再加上店舖內空間狹窄，坦白講情況非常惡劣。

面對呢種惡劣情況，平日訓練嘅優先次序係：
1. 警覺性、心理質素
自覺風險較高嘅手足/舖頭，平日都要提高警覺，尤其開舖、收舖、人流較少嘅時分。而綠衫手足受到襲擊後，仍然有反擊同制服施襲者嘅鬥心，呢樣係值得大家學習。

2. 工具嘅準備
承接第一點，平日可以喺舖頭擺放唔同工具，而且儘量放喺固定位置兼要熟悉擺放位置。但請只擺放合法而舖頭運作上必須使用嘅工具。請儘量利用自己比對家熟悉舖頭環境嘅主場優勢。

3. 體格鍛練
謹記呢啲環境底下，力量同抗打比起一切招式技巧重要。平日要多做力量訓練同適量地練抗打，身體適應疼痛感覺會幫到你面對被襲擊嘅情況。

另外，可能有人會問，習武喺呢啲情況下會有咩幫助。我地想強調習武並非單單學習招式技巧，而係平日高強度嘅對打訓練會令大家喺身體受到傷害嘅情況下，識得如何調整心態，從而：
1. 將傷害減低
2. 可以有一定程度嘅反擊，心理上震懾敵人

今次事件中，大家可以向手足學習的地方包括：
1. 即使被突襲仍然臨危不亂，盡力反擊令敵人膽怯同埋拖延時間，直至救兵黎到。
2. 有嘗試控制敵人，用其中一個敵人做肉盾，將攻擊面減少，減低傷害。

本頻祝願傷者儘早康復，並且對於手足同見義勇為者的勇氣和行動力表示讚揚。

香港人，見字飲水，習武強身健體。