#轉貼 #趙柱幫

呢幾日見到張秀賢被爆四處借錢唔還，「賺藍騙黃」嘅劣行。又有記者 陳珏明指出同張秀賢同彭卓棋，疑加入建制陣營基本法學生中心工作。加上，獄中岑敖暉Lester 呼籲擺買阿布泰，因為林景楠轉咗做污點證人…

網絡上大家都好興高采烈地食花生、Share post，出現不同嘅新聞，藍營以「黃鬥黃狗咬狗」來恥笑，種種「變節醜聞」都係「親者痛仇者快」。

「借錢唔還」、「變節」同「出賣同路人」呢三宗罪都係罪無可恕。

常言「水退就知邊個無著褲」，時間會證明一切，大家都會認清，究竟邊啲係人、邊啲係鬼…

我絕對認同要釐清同路人立場，必須是其是非其非，因為時窮節現，唔係個個喺艱難時期都有骨氣，不為五斗米折腰，要守住初心同立場。

對於同路人接二連三出現變節，除咗覺得好失望之餘，就係要警惕自己同身邊人，將來唔好成為「他們」。

政權嘅打壓令到香港有好多從政嘅戰友坐緊監，亦因為社會上無乜生存空間，亦有大量嘅前同事，因為各種政治原因及生活理由，選擇離開香港。

上年年初，我考慮到社福界未來嘅監管同宣誓，覺得發展前景一般，而選擇轉行做保險。

成功嘅原因，並唔係因為我口才好好、亦唔係因為我識咗啲咩權貴、更加唔係身邊好多有錢親戚朋友（基層公屋仔出身）。只係因為有好多好多嘅朋友、街坊及同路人嘅支持同「信任」。

所以都唔難想像點解有咁多人願意借錢比張秀賢「應急」，或者阿布泰可以咁高營利、狂開分店又搞特許經營權，業務發展得咁快…

因為大家都只係基於一個「信任」，會選擇支持黃店、支持同路人，目的就係呢個艱難時期「互相撐住」，就算時勢再壞都感受到同行嘅力量。

希望選擇留係香港嘅大家，堅持做好自己，唔好濫用呢種「信任」去偷呃拐騙，令到同路人失望，互信基礎一旦瓦解，日後嘅公民社會只會更難組織及維繫。

有能力嘅人，就互相扶持，盡自己嘅能力去幫助身邊嘅同伴，只係為咗香港變壞得慢d？創造盼望？或者只係單純到，比個社會知道，我地仲有人係香港堅持緊！

新一年，希望大家都好似我所求嘅呢支籤一樣，「萬事皆吉，眾人平安」。

節錄於
https://m.facebook.com/story.php?story_fbid=pfbid02C6mv1amgDMM2G83bpnNGovuSGdhqhLUV34iLNsQ3W5HkgDscEg5FipfG7L8NAGsxl&id=100054079726380&mibextid=qC1gEa